Act 5 | NdeIBE | STEP | Indoda eyayithiwa ngu-Ananiya ilomkayo uSafira labo bathengisa isiqinti sabo.

Acts 5

U-Ananiya LoSafira

1 Indoda eyayithiwa ngu-Ananiya ilomkayo uSafira labo bathengisa isiqinti sabo.

2 Wavumelana lomkakhe ukuthi afihle enye imali ibe ngeyabo, kwathi enye wayethula kubaphostoli.

3 UPhethro wasesithi, “Ananiya, kwenzeka kanjani ukuthi uSathane usegabhele inhliziyo yakho usuze uqamba amanga kuMoya oNgcwele, wazigcinela ingxenye yemali eliyizuzileyo ngesiqinti senu na? 4 Kanti besingesisenu yini singakathengiswa? Njalo lapho sesithengisiwe, imali ibingaqondananga lani na? Kuyini okubangele ukuthi ukhumbule ukwenza into enje na? Kawuqambelanga muntu amanga lawo kodwa uwaqambele uNkulunkulu.”

5 U-Ananiya wonela ukukuzwa lokhu watshayeka phansi wafa. Bonke abezwa ngalesisenzakalo bangenwa yikwesaba okukhulu.

6 Kwasekungena amajaha agoqela isidumbu sakhe amthwalela phandle ayamngcwaba.

7 Ngemuva kwamahora amathathu umkakhe laye wangena engazi okwasekwenzakele.

8 UPhethro wambuza wathi, “Ake ungitshele, yiyo yini le intengo eliyizuzileyo wena lo-Ananiya eyesiqinti senu na?” Wathi, “Yebo, yiyo intengo yaso.”

9 UPhethro wathi kuye, “Lenzeni ukuthi livumelane ukulinga uMoya weNkosi na? Lalela! Yizisinde zamadoda esezisemnyango asengcwabe umkakho, yikho bazakuthwala lawe.”

10 Khonokho wasakazeka phansi eduze kukaPhethro wafa. Asengena amajaha yena esefile amthwala aphuma laye aya mngcwaba malungana lomkakhe. 11 Ibandla lonke lafikelwa yikwesaba okukhulu kanye labo bonke abezwayo ngalezi izehlakalo.

Abaphostoli Basilisa Abanengi

12 Abaphostoli benza imimangaliso eminengi lezinkinga ebantwini. Amakholwa wonke ayevame ukuhlangana ndawonye eKhulusini likaSolomoni. 13 Kakho omunye owaqunga isibindi wayahlanganyela labo, lokuba basebezenzele ugazi ebantwini. 14 Kungenani, amadoda labafazi abanengi bakholwa eNkosini, bengezelela ubunengi babo. 15 Kwathi ngenxa yalokho abantu baletha abagulayo ezitaladini babalalisa emibhedeni lemacansini ukuze kuthi nje isithunzi kodwa sikaPhethro sisithe abanye babo lapho esedlula. 16 Amaxuku abantu abuthana eqhamuka emizini eyayiseduze kweJerusalema, beletha abagulayo babo lalabo ababehlukuluzwa yimimoya emibi, kwathi bonke basiliswa.

Abaphostoli Bayachukuluzwa

17 Kwasekusithi umphristi omkhulu kanye leqembu lakhe elalingelexuku labaSadusi bangenwa ngumhawu. 18 Bababopha abaphostoli babaphosela entolongweni yomuntu wonke. 19 Kodwa ebusuku ingilosi yeNkosi yavula iminyango yentolongo yabakhupha. 20 Yathi, “Hambani liyokuma emagumeni ethempeli litshele abantu lonke ilizwi lempilo entsha.”

21 Kwathi emadabukakusa bahle bangena emagumeni ethempeli, bafundisa abantu njengokutshelwa kwabo. Ekufikeni komphristi omkhulu leqembu lakhe bahle babiza iSanihedrini – inkundla yonke yabadala bako-Israyeli – bathumela ilizwi entolongweni lokuthi kulethwe abaphostoli,

22 kodwa izithunywa zathi zifika entolongweni zafumana bengasekho. Yikho zasezibuyela zayabika zathi, 23 “Sifumane intolongo ivaliwe kuhle labalindi bemi eminyango; kodwa kuthe sesiyivulile, kasibonanga muntu phakathi.”

24 Induna yabalindi bethempeli kanye labaphristi abakhulu bathi bekuzwa lokhu batsha amathe, bamangala ukuthi into le yayikhombani.

25 Kwasekufika omunye umuntu wathi, “Zwanini! Amadoda eliwaphosele ejele emi emagumeni ethempeli afundisa abantu.”

26 Besizwa lokho induna yahle yasuka lamanxusa ayo bayabaletha abaphostoli. Kabasebenzisanga udlakela ngoba besesaba ukuthi abantu babengabakhanda ngamatshe.

27 Sebebalethile abaphostoli babamisa phambi kweSanihedrini ukuthi bathonisiswe ngumphristi omkhulu.

28 Wathi, “Saliqonqosela ukuthi lingafundisi ngaleli ibizo. Kodwa seligcwalise iJerusalema ngemfundiso yenu njalo lizimisele ukusethesa umlandu ngegazi lomuntu lo.”

29 UPhethro labanye abaphostoli baphendula bathi, “Simele silalele uNkulunkulu kulokulalela abantu! 30 UNkulunkulu wabokhokho wamvusa uJesu kwabafileyo – yena elalimbulele ngokumlengisa emthini.

31 UNkulunkulu wamphakamisela kwesokunene sakhe waba yiNkosana loMsindisi ukuze anike ukuphenduka lokuthethelelwa kwezono ku-Israyeli. 32 Thina singofakazi balezizinto, njengaye uMoya oNgcwele, uNkulunkulu amnike kulabo abamlalelayo.”

33 Bathi bekuzwa lokhu bathukuthela babila, bafuna ukuthi babulawe. 34 Kodwa umFarisi owayethiwa nguGamaliyeli, engumfundisi womthetho, ehlonitshwa ngabantu bonke, wasukuma wema eSanihedrini wathi amadoda lawo kake amiswe phandle kancane.

35 Wasesithi kubo, “Madoda ako-Israyeli, cabangani kuhle ngalokhu elifuna ukukwenza kula amadoda. 36 Ngesikhathi esidlulileyo kwafika uThewuda ezitshaya umuntu oqakathekileyo, wahuga amadoda angaba ngamakhulu amane. Wabulawa, bonke abalandeli bakhe bahlakazeka, konke kwaphelela emoyeni. 37 Ngemva kwakhe uJuda, umGalile laye wavela ngezinsuku zokubalwa kwabantu wakhokhela ixuku labantu ukuba lihlamuke. Laye wabulawa, labalandeli bakhe bonke bahlakazeka. 38 Ngakho, mayelana lendaba le eyamanje ngixwayisa lokhu: Bayekeleni abantu laba! Wothani kabahambe! Ngoba nxa inhloso yabo kumbe umkhankaso wabo uvela ebantwini kuzafuba. 39 Kodwa nxa kuvela kuNkulunkulu kalisoze libe lamandla okubakhawulisa abantu laba; lizazifumana selisilwa loNkulunkulu.”

40 Inkulumo yakhe bayamukela. Bababiza abaphostoli bangeniswa kwathiwa kabatshaywe. Basebeqonqoselwa ukuthi bangaqali ukukhuluma ngebizo likaJesu, basebekhululwa.

41 Abaphostoli basuka eSanihedrini bethokoza ngokuba basebebonakalisile ukuthi babengalimela ihlazo lokulihluphekela iBizo.

42 Insuku ngensuku, emagumeni ethempeli, njalo behamba bengena indlu ngendlu, kabazange bakhawule ukufundisa lokutshumayela izindaba ezinhle ukuthi uJesu unguKhristu.